التصنيف: غير مصنف

كل مرة بقرأ أو بتعرض لأخبار عن الحوادث العنصرية بحس حالي بتعرض للمواقف العنصرية نفسها، وقراءة ردود أفعال الناس والذباب الالكتروني كأن حدا بيغز سكينة في قلبي وبيحركها يمين ويسار ليتأكد اني بتعذب كمان.

مو قادر أفهم كمية الحقد يلي ظهرت من كل مكان حرفيًا بشكل ممنهج، وفجأة تحولنا كسوريين كسبب لمشاكل كل دول العالم، والحل الوحيد أنه نموت.

ما في استراحة ولا فاصل، وهالمرة مافي حتى انتخابات ومنافسة سياسية نعلق عليها موجات العنصرية.

عطلت السوشل ميديا مع أنه عندي شغل وعملاء عليها، ومو قادر اتعرض لكمان أخبار، وبنفس الوقت مو قادر أسوي شي غير التفكير فيها، قلقان وصحيت يمكن خمس مرات خلال خمس ساعات.

بدي أروح على سيبيريا

يلعن أبو أحسن حضارة على أحسن مدنية

الأوكسجين صار مؤلم

في التسويق لازم تكون تبيع مشاعر مو منتجات، واذا ما كان في مشاعر مناسبة لتساعد على بيع منتجك، فلازم تخترع مشاعر مناسبة لتساعد على بيع منتجك.

ليبيعوا سلاح اخترعوا الوطنية.

الواحد وصل لمرحلة صار مستنزف ذهنيا وعاطفيًا من الأخبار والمجازر والكوارث، بالإضافة إلى شعور ابن كلب بالعجز والقهر، وحتى بالذنب فقط لتمتعه بالحد الأدنى من مقومات الحياة، ويحس بالذنب لأنه وصل لمرحلة مو قادر يتابع أخبار لحتى ما يحس حاله ندل وأناني.

أخبار المجازر اليومية من غزة والأخبار المؤلمة من السودان وخبر حادث انقلاب باص الطالبات في ادلب، والتعرض لأخبار سيئة من كل أنحاء العالم.

كمية التعاطف يلي لازم يقدمها الواحد (لأنها أقل شي ممكن يقدمه) ما بتتناسب مع كمية المصايب الموجودة في العالم، ويلي لااازم انه يحاول يعمل اي شي بيقدر عليه ليخفف منها بأي شكل.

كمية الشر الموجودة في هذا الكوكب، ووقاحة هذا الشر، وتعرضنا له بهذا الشكل الفيروسي تفوق الوصف. لأني فعلاً مو قادر أوصف الثقل يلي حاسس فيه.

مع مين لازم نحكي؟ شو لازم نعمل؟ هل الانقطاع عن الاطلاع على الاخبار راح يساعدنا؟ هل تعرضنا لهالأخبار راح يساعدهم؟ هل لازم نكون مقهورين ونحكي من منطلق ظلم؟ ولا لازم نحكي من منطلق قوة (مدعاة في أغلب الأحيان وربما مزيفة)؟

نعم العالم لا يفهم غير لغة القوة، ولكن أين الطريق إلى هذه القوة؟

تداخل وتعقيد المشهد السياسي والتحالفات يزيد الأمر سوءًا.

الدعم والتأييد الأعمى لـ”محور المقاومة” يعني التغاضي عن جرائم هذا المحور بحق السوريين. آلاف وعشرات الآلاف قتلوا من قبل هذا المحور. هل يمكن لمن قتل الفلسطينيين في مخيم اليرموك، ورما رجل كبير في حفرة لأنه “من حماس يا عرص” أن يحرر فلسطين من الاحتلال الاسرائيلي؟

كيف ممكن لي كسوري من أبناء الثورة السورية أن أؤيد حماس بعد أن “عادت لحضن الأسد”؟ كيف ممكن يتغاضوا عن دم الفلسطينيين يلي قتلهم الأسد، ويحموا الفلسطينيين في غزة؟

الثورة السورية (ظاهريًا) كانت تحظى بتأييد أمريكي (ظاهري)، وبعض أفراد “المعارضة السورية” اتجهوا للتواصل مع اسرائيل على أساس انها ممكن تخلصهم من الأسد، عدا عن وجود جماعات ارهابية تدعي أنها من الثورة ولم تقدم شيئًا يذكر لتحرير السوريين. المشهد السوري لوحده معقد لدرجة مرعبة، وأنا كشخص متابع للأحداث منذ البداية، بل وكنت جزءًا منها بنشاطي لسنوات، ما زلت لا أستطيع فهم هذه التحالفات الغبية ولا حتى تقديم شرح مبسط لأي شخص أجنبي يسألني عن الوضع السوري. كيف ممكن لأمريكا كسياسة وإدارة أنه تحب تنقذ السوريين، وبنفس الوقت تعمل فيتو لأي شي بيدين قتل الفلسطينيين، حتى أنه وصلت معهم مؤخرًا لفرض عقوبات على محكمة العدل الدولية wtf!

السودان الواحد ما بيعرف شو يحكي عنه (حرفيًا) الشعب المعروف بطيبة القلب وخفة الظل يعاني من هذه المجازر والحروب الأهلية التي لم تتوقف منذ عقود.

بوتين يلي دمر حلب بقصف الطيران منيح؟ أكيد لا

ما تركولنا مجال ليكون بقلبنا شي غير الحقد والكره والعجز والضعف، وبالإضافة لهيك نعاني من صعوبة معالجة الأخبار، وصعوبة تلقيها، وصعوبة التركيز في عمل أي شيء من التأثر بها، وصعوبة التطنيش والتركيز على الحياة الشخصية، والتعامل مع العنصرية الخارجية والداخلية وكل شي.

سكين اذا بلعناها بننجرح، واذا بزقناها بننجرح.

وين الواحد يطير؟ شو يعمل؟

والله ما بعرف

هل يحترم بيرنارد ارنولد زبائن شانيل؟ أم يراهم مجرد خرفان سذج؟

كل العالم عنصري بدون استثناء

وين طل الملوحي؟

الذكاء الاصطناعي والـDeep fake ترك كل العالم ودبق الممثلين السوريين الدرجة التالتة وصار يفبرلكهم فيديوهات جنسية بصيغة 3gp

درج مصطلح بودكاست في بداية الألفينات من قبل شركة آبل، وهو دمج بين “آيبود” و “برودكاست” أي البثوث المخصصة للاستماع عبر الآيبود، وذلك لتتميز عن برامج الراديو.

أسلوب جديد في تقديم المحتوى كان لشركة آبل الفضل في إشاعته، وربما لا يعرف البعض هذه المعلومة.

ولكن اليوم لم يعد هناك آيبود، ولم يعد البودكاست بودكاست. 

المقياس الصحيح لتميز بين البودكاست والبرنامج التلفزيوني أو الإذاعي هو قدرتك على استهلاك المحتوى بنسق صوتي فقط في الطريق إلى عملك أو عندما تغمض عيناك، وتسقط التسمية عن أي شيء يحتاج إلى مشاهدة لتكتمل فكرته مثل جزء كبير من المحتوى العربي المقدم اليوم على أنه بودكاست.

بالطبع أنا أتحدث هنا عن النسق Format وطريقة العرض لا عن جودة المحتوى، فقد يكون هناك الكثير من المحتوى القيم في هذه البرامج الجدية، ومن الجميل أن يلتفت صناع المحتوى العرب إلى الطرق الجديدة ويستفيدوا منها في “إثراء المحتوى العربي” الذي ما زال لا يشكل أكثر من 1% من إجمالي الانترنت.

ولكن من الخطأ أن نقول بأن برنامج عمرو أديب وأصالة نصري “بيج تايم” هو بودكاست فقط لأنهم وضعوا ميكروفونين أمامهم، بينما البرنامج يتداول فقط على قنوات MBC الالكتروني منها، ولا أعلم إن كان يُبَث تلفزيونياً أيضاً لأني لم أشاهد التلفزيون منذ سنوات، فهو يعتمد بالكامل على الفيديو بالاضافة لكونه غير موجود على أي منصة بودكاست مثل آبل بودكاست أو غيرها، فعلى أي أساس صار “بودكاست”؟!

هذا الأسلوب قدمه في البداية جو روغان في بودكاسته الشهير عن طريق الصدفة حيث كان يسجل البودكاست مع الضيف في الستوديو بأسلوب صوتي كامل، ويضع الكاميرا بشكل ثابت أمامه في بث مباشر على يوتيوب لمزيد من الإشهار، وقد نجح بذلك بأن يصبح البودكاست الأكثر استماعا في العالم، وأطلق بذلك الجيل الجديد من البودكاست.

ولكن ما زال بإمكانك إلى الآن الاستماع الى بودكاست جو روغان بشكل صوتي فقط (حصرياً على سبوتيفاي) دون الحاجة لأن تشاهد الفيديو لتفهم المحتوى.

برأيي ربما تسمية “فودكاست” أكثر دقة لبرامج مثل بيج تايم.

بالفترة القادمة راح نشوف عودة قوية لقراءة واستهلاك المحتوى المكتوب، وبالتحديد المحتوى ذو القيمة الإنسانية الحقيقية، ممكن يكون على شكل تدوينات أو مقالات بمواضيع دسمة، ونفس الفكرة تنطبق على محتوى الفيديو.

في جوع كبير لمحتوى “مفيد” عربياً، والطلب على محتوى “إنساني” راح يزيد كتير بالفترة الجاي نتيجة الإغراق يلي صار بسبب مزارع محتوى الذكاء الاصطناعي، يلي أنتجت محتوى مهما طلع أو نزل بيضل “اصطناعي”

ومع أنه معدل الانتباه Attention pace انخفض كتير بسبب السوشل ميديا، بس شباب GenZ بلشوا يكبروا ويدخلوا سوق العمل، وسوق الحياة، في واحد من أسوأ الفترات يلي ممكن يكون يعيش فيها شخص على سطح هذا الكوكب بشكل عام، وفي مستنقع الشرق الأوسط بشكل خاص.

وبمعزل عن محتوى الترفيه “والتفاهة” يلي وصل ذروته بفترة كورونا، وكان الحجر الصحي واحد من أسباب انتشاره وازدياد الطلب عليه، ومافينا نلوم الناس لهالشي، حالياً هالجيل صار بده محتوى يساعده يعرف اكتر عن الحياة، وكيف ممكن يشتغل مع ناس من أجيال مختلفة ويتواصل معهم ويستفيد من تجربتهم للتعامل مع حياته.

اليوم صعب كتير على شخص حديث التخرج من الجامعة أنه يشتري بيت (هالمشكلة في كل الكرة الأرضية) وعدا عن الناس يلي بيكون عليها قروض دراسية، ويلي فعلاً ما بتعرف شي عن العالم خارج الشاشة ولا كيف بدها تواجه مشقات الحياة والمستقبل، وأضف إلى ذلك لمواطني الشرق الأوسط قائمة طويلة من الترومات والحروب والنزوح والرعب يلي تقريباً ما توقف من بداية الألفية الجديدة.

فلذلك البحث ومحاولة الاطلاع على تجارب مفيدة والاستفادة منها راح يزداد كتير بالفترة الجاية، وهذا لا يعني بالضرورة نقص الطلب على المحتوى “التافه” ، بل يعني فقط زيادة الطلب على المحتوى “الجدي”، وقراءة مقالات طويلة عن تجارب وقصص شخصية، والاستماع لبودكاست ساعة وساعتين وتلاتة، ومشاهدة وثائقيات طويلة، وحتى قراءة كتب.

لازم كمان على كل شخص أو مؤسسة بتعمل محتوى ، انها تعمل حساب هالشي بكل شي بتعمله، وتسهل تجربة الـGenZs مع الحفاظ على هويتها وفكرها.

لازم نساعد أنفسنا ونساعدهم
وما نسمح لخوارزميات تتحكم فينا وبإنتاجنا أكتر من هيك

الأفكار براسي عن الموضوع كتير أكتر من هيك وممكن أعدل البوست أكتر من مرة لترتيب الأفكار وصقلها.