دفتر مسودة
في المدينة يقولون لي : مكانكَ ليس هنا..
في الوطن يقولون لي : مكانكَ ليس هنا..
وفي المنـ،فى يقولون لي : مكانكَ ليس هنا..
أين مكاني إذاً ؟ في الفضاء !
في مرحلة الفِطام، وأنا أحبو باكياً وراءَ أمِّي المنصرفةِ عنِّي وراءَ الكنسِ والمسحِ ونفضِ الغبارِ، كنتُ آكل كلَّ ما تطوله أظافري الغضَّة من ترابِ العتبةِ والشَّارعِ وفسحةِ الدارِ. ويبدو أنَّني أكلتُ حصَّتي من الوطن منذ ذلك الحين.
They do netflix and chill
I do soundcloud and write
بشار الأسد مجرم لدرجة أنه ما كفاه القتل والتعذيب يلي عمله خلال ٢٤ سنة، ولحق الناس يلي هربو من اجرامه إلى أقاصي الأرض ودانيها من خلال الابتزاز المالي بموضوع جوازات السفر، ومؤخرًا أصبح يحارب الناجين بأنفسهم في دول المهجر والمنفى من خلال الدفع لـ”مؤثرين” و “مشاهير” من الأردن ولبنان وتركيا ودول أخرى لترويج فكرة أن سوريا بلد آمن وصالح للحياة، والحرب انتهت، ويلا يا شباب تعالوا سياحة على سوريا.
هي الفكرة يلي عم تعمل ضغط على اللاجئين حول العالم، ويتم استغلالها من قبل التيارات المعادية للاجئين، أو حتى التيارات المعارضة في دول استضافت لاجئين، ودول بدأت فعلًا تطرد لاجئين، وترجعهم على سوريا، ويستلمهم أبو حيدر جوية، وكتير ناس تم قتلها تحت التعذيب من بداية ٢٠٢٤ الى الآن.
بشار الأسد ما زال قادر على قتل السوريين لاسلكيًا في ٢٢٠ دولة وبطرق مختلفة التعذيب النفسي غير المباشر أقلها.
ويعني لو مفكر حالك انك اذا طلعت على بلد جديد وبدك تعيش حياتك بدون ما تفكر بالموضوع، وانك خلص نفدت، وما دخلك، وما لك بالسياسة، فأنت أكتر من مجرد مخطئ، أنت ساذج وأجدب.
طالما هذا المجرم موجود، ما حدا راح يرتاح
العالم صار سوريا كبيرة
ما بدك إياني في بلدك هذا حقك (بغض النظر عن الحجج الواهية المبني عليها وعلاقتي بمشاكلك)
بس إذا برجع لبلدي، أو بروح مكان تاني هذا قرار خاص فيني أنا، ما حدا بيحق له يقرر عني.
بس فكرة أنك تحبسني عندك وممنوع من كتير من حقوقي الانسانية، وفقط مسموح أرجع لتحت بسطار بشار الأسد، هي الجريمة يلي عم يتم ارتكابها بحقي كسوري، والمسؤول عنها لست أنا، بل أنت.
كل مرة بقرأ أو بتعرض لأخبار عن الحوادث العنصرية بحس حالي بتعرض للمواقف العنصرية نفسها، وقراءة ردود أفعال الناس والذباب الالكتروني كأن حدا بيغز سكينة في قلبي وبيحركها يمين ويسار ليتأكد اني بتعذب كمان.
مو قادر أفهم كمية الحقد يلي ظهرت من كل مكان حرفيًا بشكل ممنهج، وفجأة تحولنا كسوريين كسبب لمشاكل كل دول العالم، والحل الوحيد أنه نموت.
ما في استراحة ولا فاصل، وهالمرة مافي حتى انتخابات ومنافسة سياسية نعلق عليها موجات العنصرية.
عطلت السوشل ميديا مع أنه عندي شغل وعملاء عليها، ومو قادر اتعرض لكمان أخبار، وبنفس الوقت مو قادر أسوي شي غير التفكير فيها، قلقان وصحيت يمكن خمس مرات خلال خمس ساعات.
بدي أروح على سيبيريا
يلعن أبو أحسن حضارة على أحسن مدنية
الأوكسجين صار مؤلم
في التسويق لازم تكون تبيع مشاعر مو منتجات، واذا ما كان في مشاعر مناسبة لتساعد على بيع منتجك، فلازم تخترع مشاعر مناسبة لتساعد على بيع منتجك.
ليبيعوا سلاح اخترعوا الوطنية.
الواحد وصل لمرحلة صار مستنزف ذهنيا وعاطفيًا من الأخبار والمجازر والكوارث، بالإضافة إلى شعور ابن كلب بالعجز والقهر، وحتى بالذنب فقط لتمتعه بالحد الأدنى من مقومات الحياة، ويحس بالذنب لأنه وصل لمرحلة مو قادر يتابع أخبار لحتى ما يحس حاله ندل وأناني.
أخبار المجازر اليومية من غزة والأخبار المؤلمة من السودان وخبر حادث انقلاب باص الطالبات في ادلب، والتعرض لأخبار سيئة من كل أنحاء العالم.
كمية التعاطف يلي لازم يقدمها الواحد (لأنها أقل شي ممكن يقدمه) ما بتتناسب مع كمية المصايب الموجودة في العالم، ويلي لااازم انه يحاول يعمل اي شي بيقدر عليه ليخفف منها بأي شكل.
كمية الشر الموجودة في هذا الكوكب، ووقاحة هذا الشر، وتعرضنا له بهذا الشكل الفيروسي تفوق الوصف. لأني فعلاً مو قادر أوصف الثقل يلي حاسس فيه.
مع مين لازم نحكي؟ شو لازم نعمل؟ هل الانقطاع عن الاطلاع على الاخبار راح يساعدنا؟ هل تعرضنا لهالأخبار راح يساعدهم؟ هل لازم نكون مقهورين ونحكي من منطلق ظلم؟ ولا لازم نحكي من منطلق قوة (مدعاة في أغلب الأحيان وربما مزيفة)؟
نعم العالم لا يفهم غير لغة القوة، ولكن أين الطريق إلى هذه القوة؟
تداخل وتعقيد المشهد السياسي والتحالفات يزيد الأمر سوءًا.
الدعم والتأييد الأعمى لـ”محور المقاومة” يعني التغاضي عن جرائم هذا المحور بحق السوريين. آلاف وعشرات الآلاف قتلوا من قبل هذا المحور. هل يمكن لمن قتل الفلسطينيين في مخيم اليرموك، ورما رجل كبير في حفرة لأنه “من حماس يا عرص” أن يحرر فلسطين من الاحتلال الاسرائيلي؟
كيف ممكن لي كسوري من أبناء الثورة السورية أن أؤيد حماس بعد أن “عادت لحضن الأسد”؟ كيف ممكن يتغاضوا عن دم الفلسطينيين يلي قتلهم الأسد، ويحموا الفلسطينيين في غزة؟
الثورة السورية (ظاهريًا) كانت تحظى بتأييد أمريكي (ظاهري)، وبعض أفراد “المعارضة السورية” اتجهوا للتواصل مع اسرائيل على أساس انها ممكن تخلصهم من الأسد، عدا عن وجود جماعات ارهابية تدعي أنها من الثورة ولم تقدم شيئًا يذكر لتحرير السوريين. المشهد السوري لوحده معقد لدرجة مرعبة، وأنا كشخص متابع للأحداث منذ البداية، بل وكنت جزءًا منها بنشاطي لسنوات، ما زلت لا أستطيع فهم هذه التحالفات الغبية ولا حتى تقديم شرح مبسط لأي شخص أجنبي يسألني عن الوضع السوري. كيف ممكن لأمريكا كسياسة وإدارة أنه تحب تنقذ السوريين، وبنفس الوقت تعمل فيتو لأي شي بيدين قتل الفلسطينيين، حتى أنه وصلت معهم مؤخرًا لفرض عقوبات على محكمة العدل الدولية wtf!
السودان الواحد ما بيعرف شو يحكي عنه (حرفيًا) الشعب المعروف بطيبة القلب وخفة الظل يعاني من هذه المجازر والحروب الأهلية التي لم تتوقف منذ عقود.
بوتين يلي دمر حلب بقصف الطيران منيح؟ أكيد لا
ما تركولنا مجال ليكون بقلبنا شي غير الحقد والكره والعجز والضعف، وبالإضافة لهيك نعاني من صعوبة معالجة الأخبار، وصعوبة تلقيها، وصعوبة التركيز في عمل أي شيء من التأثر بها، وصعوبة التطنيش والتركيز على الحياة الشخصية، والتعامل مع العنصرية الخارجية والداخلية وكل شي.
سكين اذا بلعناها بننجرح، واذا بزقناها بننجرح.
وين الواحد يطير؟ شو يعمل؟
والله ما بعرف
هل يحترم بيرنارد ارنولد زبائن شانيل؟ أم يراهم مجرد خرفان سذج؟
كل العالم عنصري بدون استثناء
